Jedes Johr sait d SUVA uns, wo d Unfallgfoohre liige,
Verletzige am Arbetsplatz, die sige hailoos gstiige.
nur bi de Oligarche isches diss johr ganz speziell,
do stöhn d Stürz ussem Fänschter neu an allererster Stell!
E neue Job isch indr Zyttig sytt geschter uffgschalte,
mr hänn das gläse, au wenn mir unsri Jöbs wänn bhalte.
Stargg muesch syy und s Wichtigschte, belaschtbar unter Drugg,
s isch nidd e Job bim FCB, nai als Margrethebrugg!
Dr Herter Balz wird härter bald, bim Bligg uff d Brandeburger
Verliebt über Parteie wäg, es wird immer absurder.
Do hänn sich zwei Polit-Schweergwicht, uff eimol schyynbar gfunde,
Mir frooge uns liggt är im Bett, wie bi de Wahle unde.
Als Bundesroot stellt Basel stolz, dr Beat Jans zur Wahl,
Am Jositsch D., wo au gärn möcht, wird dass e kurzi Qual.
Dr Jans wird gwählt, und z Basel gits, em Budget wieder Luft,
E grosses Plus, dr Stüürsatz sinkt, will kein meh Cüpli sufft!
Dr Papst in Rom dä gitt de Schwuule andlig au si Sääge,
Au in dr Kirche sell me doch, dr gueti Umgang pflääge.
d Idee die liggt jo uff dr Hand, für uns isch klipp und klar,
Jetzt fiehre d Priester d Minnistrante bald vor e Altar!
Wenn mir in schwarz nyt luschdig sinn do könne dir druf wette,
Bekömme mir das zspyyre und -- kaine dued uns rette.
Uff däre Wält do gits no me, wo schwarzi Goschtyym traage,
Doch fahre die e Bangg and Wand gohts däne nie an Kraage!
Dr Silvio seelig hett sich gärn an junge Maidli griibe
Nidd wytt ewägg im Vatikan hänn sii’s no schlimmer driibe.
Vom Biden in Amerika mien mir das nidd erwarte,
bevor as das passiert verirrt ar sich im eigne Garte.
Dr Eländ Musk kennt s Alphabet scho wiene ganz e Grosse,
doch s neue Twitter Logo isch e mängem suur uffgstosse.
S Guete isch, dass är drmit bitz Klarheit gschaffe hett,
Denn s X isch sicher nööcher wie dr Vogel bi däm Z!
Daas Johr hämmr leider amne Kinschtler d Arbet gstoohle,
s'sott nidd so si bi uns hett KI d Helge derfe moole.
Doch bi, aim Job, do sinn mir ehrlig, wurdes gärn no gseh,
Dass d KI d Fiehrig yybernimmt bi unsrem FCB
Mir hänn do neulig, vo so runde Kaffibölle gheert,
und wundre uns, wie sinn die gmacht, die siige no begehrt.
Nochhaltig guet fyrs Klima, d Konsistänz muesch moll erlääbe,
Mir frooge uns sinns Gaggibölle voode Klimakläber!
Gränze zue e Haag rundum, jä mir löhn niemrds ihne,
So fremdi lüt die dien uns doch, kriminell erschyyne.
Dr Erkan dä het jetze denn, die Diskussione satt,
Schreit: keini offne Freizyttgärte do in Basel-Stadt!
Mit ÖV darfsch so viel de willsch in Dytschland di beweege,
muesch nur das nüünevierzig Euro Ticket go vorleege.
Für d Schwoobe z Basel gäbs e Leesig --- mir hättes indr Hand,
E Ticket gratis und diräggt - zrugg ins Schwoobeland!
Hundertfuffzig Johr s isch wohr, gitts unsre basler Zolli
Mr hänn vernoo, es heigi doo e Attraktion e tolli
Es hett uns paggt, mr sinn grad los, so fescht hänn mir das welle,
Vo däre struube Exkursion mien mir euch jetzt verzelle.
S Aquarium als erste Halt, dr Abligg isch e Qual,
Do schwimmt dr zittrig Vladi Pudding mit de Zitteraal.
S Piranha-Beggi nääbedra s isch gfürchig und nidd ohni,
Dert isch uf Schluuchbootjaggt e wiiblich Fisch, es isch d Melooni
Ewägg vo do, vo wittem sehsch, e schnützige Kumpaan,
Naagt d Biiberratte Erdogan am EU-Biitrittsplan.
E Bsunders freud hänn mir wenn d Pingus dusse dien spaziere
Dr Biden gwagglet hindedrii will dä muesch immer fiehre.
Im näggste Gheeg, do überwacht, z erkenne ischs genau,
Dr Schissiping die ganzi Wält als diggi Wullesau.
Refrain:
Oh Schubidu, die sin genau wie Du-hu-u
Wie du und ich, nur die sin rych u-hu
Jä die häns ganze Gäld, hersche über unsri Wält
du bisch ne glych, genau wie ich u-hu
Am Wägrand langsam, ohni Ziel, kriecht über Morsches Holz
Planlos und e bitz verwirrt dr Nacktschnägg Olaf Scholz.
Und do wär schläggt do gnüsslig siesse Honig uss dr Waabe
Dr Brummbär Viktor Orban gönnt sich zfiede EU-Gaabe
Im Affehuus baut ein e Muur mit sine eigne Händ
Dr Orangsch Utan Donneld Trump uss sine Exkremänt.
Nääbedra sy Fründ und Kumpel Drummlet uff si Bruscht
Dr King Kong Un dä wietet ohni Rücksicht uf Verluscht.
Bii de Ellifante gsehschen, - wirkt e bitz verloore
es winkt uns zue dr Keenig Charles, mit sine grosse Ohre
E Rundgang in däm Umfang dure scheene Basler Zolli
Verruggti Affe, schreegi Veegel, Wääse grauevolli
Zem guete Glügg, mr sinn rächt froh im Traum hetts für uns gstumme
Sinn die Gstalte in de Gheeg und laufe nidd frei umme.
Refrain:
Oh Schubidu, die sin genau wie Du-hu-u
Wie du und ich, nur die sin rych u-hu
Jä die häns ganze Gäld, hersche über unsri Wält
du bisch ne glych, genau wie ich u-hu