Shaq

Dr Shäq-Ättäck isch wider bäck, jä d’Stimmig isch famos
Trotz bitz me Spägg frisst är no Drägg, jä är spilt grandios
Will d´Villa nonig stoot het är zur Mamme miesse wyche
Bezieht sis alte Zimmer und au s´Bettli isch no s glyche

Tramhaltstell

Z´Basel baue alli gärn em Himmel immer nöcher
Au bi de Haltestelle wärde d Randstai ständig höcher
Knallsch drii mim Geppel, gheisch uf d Schnitz, bisch denn e Glumbbe Brei
Im Rollstuehl kunsch drnoo ins Drämmli ganz barrierefrei

s Lotti

S Oma Lotti reggt sich uff, e Fliege duet si blooge,
Fliegt um ihr Kopf und hett sich scho sit Stunde nidd verzooge,
Jetzt ändlig isch die Fliege wägg, doch jetzt fliegt s Oma Lotti,
bim uselaufe iiber soone schiss Elektrodrotti

Oligarche

Ledschtjoor hän mir über Stürz vo Oligarche gsunge
Sythär sinn schowider baar ussem Fänschter «gsprunge»
Es fallt und fallt und fallt halt uf in Russland ischs normal
Ob Putin oder Fänstersturz au dert hesch frei y Wahl

Dubaischoggi

Zartbitter dunggli Schoggi dusse, gryen und gröntschi dinne
Uns iritiert, dass so viel Lyt, uf dä Hype ufspringe
E Zwanzgerneetli zahlsch du und am Änd ischs no vrgäbe
In Dubai uf dr Baustell zahlsch au öffters mit em Läbe

Konzäpt

Rassistisch und sexistisch und Chefs wo Schwuli hasse
Im Kopf nit gsund, schlön andri wund, polarisiere d Masse
Beidi hän sis glych Konzäpt mir könnes nit vrstoo
D AFD die het gnueg Lüt dr Schmiir gehn si drvoo

Royals

Dr Kenig und au d Kate die hets grad ledschtjoor beidi troffe
Als ganzes Volgg  uf dr Insle hän si miesse hoffe
Die Royals hän e haide Glügg, die Kranket isch vom Disch
Nur z Basel duet me druure, will dr Kräbs vrschwunde isch

Too Good To Go

Too Good too go das isch e App, dert kasch du Sache kaufe
Wo im Laade niemer wott und s Datum duet ablaufe
Alles wird mol iiberfellig, jede Pris ischs z´viel
Bim Basilisk im Güggli drin, isch dr vo Wattewyyl

Böög

In däm Zyri isch ledscht Joor dä Böög nit explodiert
Dä Schytter-Huffe het me drum ind Ostschwyz disloziert
Zem Thema Bögg hän mir au gryblet Distanz isch uns no wichitg
Vrschiebed doch statt nur dä Böög ganz Zyri in die Richtig

Grysel

Di Hand zum Schritt e Glapps an Arsch, s passiert dir jede Daag
Du bisch e Hängschd, e stargge Maa und weisch was Frau so mag
Normalerwys goht das ganz schnäll, di Job dä isch ewägg
Schaff doch bi dr Uni s´intressiert se dert e Drägg

e Grosse

Dr Hansli het e wahnsins Teil, dued ihn gärn presentiere
Dr Hansli findets bsunders geil, wenn är ihn duet poliere
Dr Hansli het no nie Problem mit sinere Lengi gha
Jetzt het är gmerkt bim pargge lohnt sichs doch, e Kurze zha

ESC

Ob „Ball“, ob „Gsang“, mir wüsses scho, im Stadion s‘wird real
Ob Rot-Blau oder Räägeboge, d Stimmig wird feudal
Bim Schutte ischs wie eh und je, wär meeh Gool hett, dä gwinnt
Bim ESC gwinnt maischtens dä, wo s gändret' Gschlächt mitbringt

Umwäg

E Baustell do, e Sperrig dert, dr Wäg het huffe Hürde,
Kunsch nit vom Flägg, kunnsch nit vora, au wenn das d Lyt gärn würde,
Ufem Velo rutscht si umme, si het kei Profil
S Esti Käller kunnt au nur mit Umwäg an ihr Ziel

Eländ

Dr Eländ Musk het Grössewahn und d Hand ganz wit rächts obe
Es isch no gar nit so lang här, me kennts no vo de Schwoobe
Und bald scho kunnt sy neyste Hit noch sim Elektroraser
Baut Tesla ab em Dreiedrissig Auto mit Vergaaser

Krise

Wo mir gstudiert hänn yber Värs
Sinn mir nur gstoosse, s isch perwärs,
Uf Krise, 
Vor lutter Kriise, wisse nymm
Isch si banal oder doch schlimm,
Die Krise
 
Verpassischs Drämmli soone Drägg,
Dr Zebrastraife isch zwytt wägg,
E Krise
Im Streife z Gaza jo me hörts,
Haglets Bömbli, niemer störts,
E Krise
 
Wieder z viel gfrässe, s macht di muff,
Dr Hooseknopf dä platzt dir uff,
E Krise
In gwisse Länder s schynts e Bruuch,
Au wenns nytt git blaaiht dert dr Buuch
E Krise
 
Hett ein e Pfyffli oder zwei,
Oder gar nytt zwüschde Bei
E Krise
An andre Ort, s isch unbestritte,
Wirsch als Meidli dört beschnitte
E Krise
 
E Invasion är macht sich breit
Dr Japankäfer bringt uns Leid,
E Krise
Und wär sehsch du noohdisnoh
Immer neecher zuenis koo,
D Chinese
  
De schüümsch vor Wuet und stohsch im Stau,
Es gitt kei Autobahnuussbau,
E Krise
Im Flüchtlichsböötli hesch di Rueh
Und Meeresbriise no drzue
E Krise
 
Es isch fatal bim Deite hytt
Triffsch allewyl die falsche Lyt
E Krise
S git do Ort wos andrescht lauft,
Wirsch für zwei Kamel vrkauft
E Krise
 
Du reggsch di uff ab glaine Sache,
Duesch uss Chance Krise mache
E Krise
Will es isch e Froog vom Mindset
Au wenn Mänge vo euch keins het
E Krise
 
Drum d Moral vo däre Gschicht
Zwüsche de Ziile im Gedicht
E Chance
Drum gniesset d Fasnacht suugets y
Villicht wirds euri ledschti sy